沈雁Jean精選黃金CD專輯

新鮮由台灣空運抵港，香港無得賣o架，^--^。台灣八十年代玉女歌手，一首"踏浪"真係無人不識，可惜後勁不繼，幾隻碟之後就玩完，呢隻碟只收錄佢初出道首兩隻大碟o既歌曲，至於＜蹦蹦一串心＞同＜俏如彩蝶飛飛飛＞等大碟就無啦，唔知有關方面幾時幫阿Jean補出番呢？

推介歌曲：踏浪、我踏浪而來、在這裡、大海就在前方。

精選CD專輯--沈雁

估唔到香港都搵到一隻沈雁CD，同樣係台灣歌林天龍出品，專輯編號同上面隻一樣，但係d歌又唔同，而且封面製作粗糙，音質又無上面隻咁好，唔通係翻版？最激氣係隻＜一串心＞原來翻錄自黑膠！唔駛問阿貴，呢隻肯定係翻版！！

推介歌曲：一串心、奈何、不能遲到、蘭花草。

來生緣--卓依婷

相信去過大陸o既人，都應該識得卓依婷啦，佢0既VCD真係無處不在，雖然係台灣人，但係國內就好受歡迎；雖然人仔細細，但就有十幾年歌齡啦！而且d歌都唱得唔錯o架，主要係翻唱國語舊歌。佢出親唱片，我一定捧場o既！嘻嘻。

推介歌曲：中國、中華民謠、夢醒時分、用心良苦。

經典輯--銀霞

原來銀霞係廿幾三十年前0既前輩歌手，仲以為佢同蔡琴同期添！其實認識佢都全賴大陸懷舊VCD，因為d歌曲大部分取材自呢類歌曲，易入耳又易唱，唔怪得阿A錄完到阿B錄啦，同一首歌可能有N咁多個版本，不過d歌真係經得起時間考驗，依家聽番都咁好聽！

推介歌曲：你那好冷的小手、蝸牛與黃鸝鳥、我來彈你來唱、問候歌、蘭花草、結。

更能消受幾番風雨--何嘉麗

何嘉麗最差o既一隻，同係新力或者現代時期o既作品真係差得太遠，唔怪得出完呢張即刻玩完啦。

推介歌曲：結果。

關正傑

康藝成音只係張徐小鳳歌藝事業再推向高峰，但係關正傑同許冠傑就叫好唔叫座，唔通康藝成音同個名有傑字o既歌星唔夾？抑或有或他原因，如果你知道，可唔可以話過我知呢？多謝先。

推介歌曲：一把聲音、香江歲月、寶貝兒。

華納國語金曲第二輯--群星

買此碟完全因為王芷蕾，一把好靚、好圓潤同好醉人0既聲音，可惜只得一首歌！不過唔緊要，可以上網補購番佢o既精選碟。呢隻碟真係高手雲集，包括有蔡琴、黃鶯鶯、蘇芮、蔡幸娟、娃娃同姜育恆。

推介歌曲：也是幸運、天天天天、驛動的心、跟著感覺走、時間的河、心中的傷痕、留不住的故事。

Paula--徐小鳳

呢個做型都可算經典啦！戚美珍同盧海鵬都係著住呢條波波裙o黎小鳳姐o架，阿戚就最神似，而粗眉大眼o既盧海鵬就最搞笑。呢三隻碟，寶記都未出過復刻板o架，不過唔知點解呢？

推介歌曲：香江暖流、誰又欠了誰、夢飛行、香港夜上海、心頭石、自己人。

一生所愛--徐小鳳

呢隻係小鳳姐o係寶記時期我最鍾意0既CD，唔單止歌好聽，連做型都好靚，原來小鳳個鼻，o係側睇係好直好靚o架！而繼呢張之後，佢d歌就開始無咁好聽啦，唔知係咪轉o左監製呢？

推介歌曲：長征、時候來了、變色感情、一生所愛、情人夢裡追、雙城記。

依然--徐小鳳

記得當年o係何嘉麗日日洗腦之下，隻＜重逢是個夢＞就成為呢隻碟入面我最鍾意o既歌啦，尤其係d鋼琴前奏，真係好正。小鳳姐係寶記o個幾年，演唱會開完一場又一場，真係賺到盆滿砵滿。唔知佢幾時復出，再為大家唱番幾場呢？

推介歌曲：重逢是個夢、圓缺、流下眼淚前、春天的小雨、橫直線。

Denon master sonic--陳百強

只要$33.3就可擁有此碟，真係非常超值，我諗可能係sales搞錯都未定！DMI + EMI精選，除o左幾首歌係翻錄自LP之外，真係無得彈。

推介歌曲：感情到老、冬戀、迷失中有著你、飛越彩虹、我的故事、眼淚為你流、痴心眼內藏、至愛、夢裡人。

33首招牌歌--羅文

記得今年公司擺春茗，請0左佢做表演嘉賓呀！從未見過有咁靚o既CD包裝！個盒係絨面o架！真係同入面0既歌手、歌曲匹佩！皆因大家都係一流！雙CD，仲有好多首歌從未出過CD添，一字記之曰"正"！

推介歌曲：把握、塵緣、掌聲響起、春天的角落、中國夢、同途萬里人、夢非夢、在我生命裡、朋友一個、白色聖誕夜、紅塵夢。

文明浪族--呂珊

如果無運氣，任你幾叻都係假，尤其係娛樂圈！好似呂珊咁，唱o左廿幾年，除o左＜3650夜＞奪取過白金唱片之外，成績真係麻麻，不過有實力o既，始終會得到歌迷支持o既！

推介歌曲：時光倒流、歌迷、文明浪族、風原是你、回頭。

創作+流行歌集--林子祥

林子祥o既一張靚聲唱片，而且幕後猛人雲集，包括有黃啟光混音，鮑比達、鍾定一等編曲，至於作o左5首歌o既阿Lam，都無令我失望，真係可以同＜創作歌集＞fight呀！

推介歌曲：結伴同航、昨日街頭、從前日後與這天、深夜裡、每夜唱不停、雨點、終於勝利。